Wednesday, April 29, 2015

പടച്ചോന്റെ ക്യാമറ.!!



ളന്നു മുറിച്ച രണ്ടു മാസത്തിലെ ലീവില്‍ വീട് പണി എങ്ങിനെയെങ്കിലും ഒന്ന്  പൂര്‍ത്തിയാക്കാന്‍ കിണഞ്ഞു പരിശ്രമിക്കുകയായിരുന്നു.തിരക്കോട് തിരക്ക്. പിരിവുകാരെയും എല്‍ ഐസിക്കാരെയും എത്ര ദൂരെനിന്നു കണ്ടാലും തിരിച്ചറിയാന്‍ ഒരു പ്രത്യേക പരിശീലനം ഇതിനോടകം ഞാന്‍ നേടിയിരുന്നു.രാവിലെ തന്നെ ബംഗാളികളുടെ തട്ടും മുട്ടും കേട്ടാണ് തൊട്ടടുത്തു തന്നെയുള്ള വീടുപണി നടക്കുന്നിടത്ത് ചെന്നത്.അപ്പോഴതാ കോട്ടും ടയ്യും കെട്ടി രണ്ടു മൂന്നു ഫ്രീക്കന്‍സ് പിള്ളേര്‍ ഒരു പുതുപുത്തന്‍ കാറില്‍ മുറ്റത്ത്.
"സര്‍ നമസ്കാരം". ആ സര്‍ വിളി  കേട്ടാല്‍ ആരും വീണുപോകും.ഇവിടെ അറബികളെ സര്‍ എന്ന് വിളിക്കുന്നത് പോലെയല്ല, നാട്ടില്‍ നമ്മളെ ചിലര്‍ "സര്‍" എന്ന് വിളിക്കുന്നത്.
"സര്‍ ഞങ്ങളെ മനസ്സിലായോ"? കണ്ടിട്ടു ഒരു പരിചയവും തോന്നുന്നില്ല.
"സോറി എനിക്ക് മനസ്സിലായില്ലട്ടോ,ആരാ എവിടുന്നാ"?
"സര്‍  ബീ ആന്‍റ് ടി എന്ന്  കേട്ടിട്ടുണ്ടോ?". കണ്ണും പൂട്ടി ഞാന്‍ പറഞ്ഞു "ഇല്ല കേട്ടിട്ടില്ല"
"സര്‍ ഞങ്ങള്‍ കേരളത്തിലെ ഏറ്റവും അറിയപ്പെടുന്ന സെക്യൂരിറ്റി കമ്പനിയില്‍ നിന്നാണ് വരുന്നത്. വീടിന്റെ പണിപൂര്‍ത്തിയാവാന്‍ പോവുകയല്ലേ, സി സി ടി വിയൊന്നും വെക്കുന്നില്ലേ? സുരക്ഷയാണ് പ്രധാനം"