ദിവ്യന്‍റെ കൊറോണ പ്രവചനം !.

മിത്രോം .. പത്ത് വർഷങ്ങൾക്ക് മുമ്പ് എനിക്ക് കിട്ടിയ ഒരു സന്ദേശമാണിത് , ഇത് വായിക്കുമ്പോൾ നിങ്ങളെന്നെ സംഘിയാക്കും , എന്നാലും ഞാൻ എൻ്റെ രക്ഷക്കായി ഷെയർ ചെയ്യുന്നു :)

" എൻ്റെ ഭാരത പര്യാടനത്തിൽ ഗുജറാത്തിലെ ഒരു ചായക്കട സത്രത്തിൽ ഞാൻ തളർന്നുറങ്ങുകയായിരുന്നു , ചായക്കട മുതലാളി , കുടിച്ച ചായയുടെ ക്യാഷ് കൊടുക്കാത്തതിനാൽ തീരുമ്പോൾ തീരുമ്പോൾ പണി തന്നു അറഞ്ചം പുറഞ്ചം എന്നെക്കൊണ്ട് ഗ്ലാസ് കഴുകിച്ചുക്കൊണ്ടിരിക്കുമ്പോഴാണ് ഒരു ജ്ഞാനി എൻ്റെ അടുത്തുവന്നത്

എന്നിട്ട് എന്നോട് ഇങ്ങിനെ പറഞു .

'' മകനെ ആര്യപുത്രാ , നമ്മുടെ അഖണ്ഡ ഭാരതത്തിൽ
ചൈനയിൽ നിന്നും ഇന്നേക്ക് കൃത്യം 10 വർഷങ്ങൾക്ക് ശേഷം ഒരു വൈറസ് പൊട്ടി പുറപ്പെടും , അത് ലോകമാകെ സഞ്ചരിക്കും , യൂറോപ്യൻ രാജ്യങ്ങളിൽ കൂടി അത് അമേരിക്കയിലെത്തും, യൂറോപ്പിൽ കോവിഡ് 19 എന്ന മതത്തിൽ ആ വൈറസ് വിശ്വസിക്കും അമേരിക്കയിൽ എത്തുമ്പോൾ " ചൈനാ വൈറസെന്ന മതത്തിലേക്കത് വിശ്വാസം മാറ്റും ,

പിന്നീട് ലോകത്തിൻ്റെ പല ഭാഗങ്ങളിൽ കൂടി അത് , കോസ്മിക്ക് രശ്മി എന്ന സ്വയം നിർമ്മിത സാങ്കേതിക വിദ്യ ഉപയോഗിച്ച് എമിഗ്രേഷൻ കൗണ്ടറുകളെ സൂത്രത്തിൽ കണ്ണുവെട്ടിച്ച് ഒര ദിവസമത് ഭാരതത്തിലെ മനോരമ 24 ചാനലുകളിൽ എത്തിച്ചേരും , അവിടെ നിന്നുമത് മതം മാറി " തബ്ലീഗ് കൊറോണ " എന്ന പുതിയ പേര് സ്വീകരിച്ച് ഇന്ത്യയൊട്ടുക്കും സഞ്ചരിക്കും .

മകനെ ഭയപ്പെടേണ്ട , ഈ മാഹാമാരിയിൽ നിന്നും നിങ്ങളെ രക്ഷിക്കാൻ ഒരാൾ അവതാരമെടുത്തിട്ടുണ്ട് , കൃത്യ സമയത്ത് അയാൾ പ്രത്യക്ഷപ്പെടും ,നിങ്ങള്‍ക്ക് വേണ്ട നിര്‍ദ്ദേശങ്ങള്‍ നല്‍കും അദ്ധേഹം കൊറോണയെ ഓടിക്കുന്ന രീതി പ്രപഞ്ചത്തിനാകെ മാതൃകയായിരിക്കും ,

ഒരു അര്‍ദ്ധരാത്രി അദ്ദേഹം നിങ്ങളുടെ മുന്നില്‍ പ്രത്യക്ഷപ്പെടും , എന്നിട്ട് "മങ്കി" ബാത്തിലെ ശ്ലോകങ്ങൾ ഉദ്ദരിച്ച്‌ ഇങ്ങിനെ അരുള്‍ ചെയ്യപ്പെടും !,

" കൊറോണയെ തുരത്താന്‍ ഞാന്‍ പറയുന്നത് അനുസരിച്ചാലും സതീര്‍ത്ഥ്യന്സ് ..ആദ്യമായി നിങ്ങള്‍ കൊറോണയെ സ്നേഹ പൂര്‍വ്വം വീട്ടിലേക്ക് വിളിക്കുക :) വെല്‍ക്കം ഡ്രിങ്ക് ആയി ഗോ മൂത്രം കുടിപ്പിക്കുക ,അങ്ങിനെ ചെയ്യുന്ന വശം കൊറോണ വയറിളക്കം പിടിച്ചു നാം ഭാരതത്തിലേക്ക് സംഭാവന ചെയ്ത "ശോചനാലായത്തിലേക്ക് " ഓടും ,ഉടന്‍ നിങ്ങള്‍ ആ വാതില്‍ അടക്കുക :) കൊറോണ ചമ്മി പ്പോവും .എന്നിട്ട് ഒരു ദിവസം മുഴുവന്‍ നിങ്ങള്‍ വീട്ടില്‍ തന്നെ ഒന്നും കഴിക്കാതെയിരിക്കുക .അന്നേരം കൊറോണക്ക് ബോറടി തുടങ്ങി പുറത്തേക്ക് ഇറങ്ങാന്‍ തോന്നും ഈ സമയം നിങ്ങള്‍ അടുക്കളയിലുള്ള പാത്രങ്ങള്‍ കൊട്ടി കൊറോണയെ അവിടെ തെന്നെ ഇരുത്തുക ..പതിമൂന്നാം ദിവസം അത് സംഭവിക്കും , അര്‍ദ്ധ രാത്രി നിങ്ങള്‍ ലൈറ്റ് അണക്കുക ,,എല്ലാരും ഉറങ്ങിയെന്നു കരുതി കൊറോണ പുറത്തേക്ക് ഇറങ്ങും, കണ്ണ് കാണാത്തതിനാല്‍ കൊറോണ നട്ടം തിരിയുമ്പോള്‍ പെട്ടന്നു എല്ലാവരും വിളക്കു കത്തിക്കുക ..വിളക്കിനരികിലേക്ക് ഓടിയെത്തുന്ന കൊറോണകള്‍ ഓരോന്നായി എരിഞ്ഞടങ്ങും "

അങ്ങിനെ ഭക്തജനങ്ങള്‍ "പൂജ്യ"നേ സാഷ്ടാംഗം നമിക്കുകയും രാജ്യത്ത് ഐശ്വര്യം വിളയാടുകയും ചെയ്യും :)

മകനെ ഈ വിവരം നീ ഫേസ് ബുക്ക് വഴി എ ല്ലാവരെയും അറിയിക്കുക , നൂറുപേര്‍ക്ക് ഷെയര്‍ ചെയ്യുക , ഇത് വായിച്ചു ലൈക് അടിക്കാതെ പോവുന്നവര്‍ക്ക് വലിയ അപകടം സംഭവിക്കും ,,അല്ലാത്തവര്ക്ക് ഐശ്വര്യം വന്നു ഭവിക്കും ..

ഇത്രയൊക്കെ നല്ല ഉപദേശം തന്ന ആ മനുഷിക്ക് ഒരു ചായ കൊടുക്കാന്‍ ഞാന്‍ തിരിഞ്ഞതും അയാൾ അപ്രത്യക്ഷമായതും ഒന്നിച്ചായിരുന്നു..

അദ്ദേഹം ഇതില്‍ നിന്നും പറഞ്ഞപോലെ ചെയ്യാനുള്ള സമയമായിരിക്കുന്നു , ആയതിനാൽ ഈ വിവരം ഞാന്‍ നിങ്ങളെ അറിയിക്കുകയാണ് !
എനിക്ക് രക്ഷപ്പെടാന്‍ വേണ്ടി