അസ്സന്‍കുട്ടിയുടെ ബിമാനം.!!

​​

                                        

ചെത്തായി  പാലത്തിന്റെ കൈവരിയില്‍ കറുപ്പ് കരയുള്ള വെള്ളമുണ്ടും തൊപ്പിയും വെച്ച് അസ്സന്‍കുട്ടി കാത്തിരിപ്പ് തുടങ്ങിയിട്ട് സമയമേറെയായി. മദ്രസയിലെ ഖിറാ അത്ത് തുടങ്ങിയാല്‍ പിന്നെ ചെല്ലുന്നോര്‍ക്കെല്ലാം അബ്ദു മുസ്ലിയാരുടെ ചൂരലടിയോ ബെഞ്ചില്‍ കേറ്റിനിര്‍ത്തലോ ഒക്കെയാവും ശിക്ഷ. അസ്സന്‍കുട്ടിക്ക് ഈ ശിക്ഷയൊന്നും പുത്തരിയല്ല. അന്‍വറും കുഞ്ഞിമ്മുവുമൊക്കെ എപ്പോഴോ പോയി. രണ്ടുമൂന്നുദിവസം നിര്‍ത്താതെ മഴ പെയ്തപ്പോള്‍ ചെത്തായി തോട് നിറഞ്ഞുകവിഞ്ഞിരിക്കുന്നു. തോടിനു കുറുകെ കെട്ടിയ, വണ്ണംകൂടിയ തെങ്ങുപാലം കടന്നുവേണം മണ്ണുമ്മല്‍ അങ്ങാടിയിലെ മദ്രസയിലേക്കെത്താന്‍ .

"ഐശൂ നെ കാത്ത് ക്കാണ് ഓള്‍ക്ക് ഒറ്റക്ക് അക്കെരെ കടക്കാന്‍ പേട്യാ​..​"

 വല്യ പറമ്പത്ത് മുഹമ്മദാജിയുടെ  മകളാണ്  ഐശൂ . രണ്ടരയേക്കര്‍ തെങ്ങിന്‍തോപ്പിലെ വലിയ മണിമാളികയിലുള്ള തറവാട്ടിലെ ഹാജിയാരുടെ പുന്നാരമോള്‍. ചെറുപ്പത്തില്‍ ഉപ്പ നഷ്ടപ്പെട്ട അസ്സന്‍കുട്ടിയെ ഹാജിയാരുടെ വീട്ടില്‍ നെല്ലുകുത്തിയും അടുക്കളപ്പണിയെടുത്തുമായിരുന്നു    ഉമ്മപോറ്റിയത്. സ്കൂളും മദ്രസയും ഇല്ലാത്ത ദിവസം ഉമ്മയുടെ കൂടെ അസ്സന്‍കുട്ടിയും അവിടെ പോകും. ഐശൂനെ സ്കൂളിലും മദ്രസ്സയിലും കൊണ്ടുപോവലും വരലുമൊക്കെ അസ്സന്‍കുട്ടിയുടെ ചുമതലയായിരുന്നു. മണ്ണുമ്മല്‍ അങ്ങാടിയില്‍നിന്നും ആരും കാണാതെ ഐശൂന് പുളിയച്ചാറും പേടെങ്ങല്‍ താലപ്പൊലിക്ക് ശര്‍ക്കര മിട്ടായിയും വാങ്ങുന്നതൊക്കെ അസ്സന്‍കുട്ടിയുടെ അവകാശമായിരുന്നു.കാത്തുനിന്ന് സമയം പോയതല്ലാതെ ഐശു വന്നില്ല.അസുഖം വല്ലതുമാവും എന്നുകരുതി സമാധാനിച്ചു.​ ഇനിയും താമസിച്ചാലുണ്ടാകുന്ന ചൂരല്‍ശിക്ഷ ഭയന്ന്
അസ്സന്‍കുട്ടി  മദ്രസ്സയിലേക്ക് നടന്നു.എന്നാല്‍ പിറ്റേദിവസമോ അതിനടുത്തുള്ള ദിവസമോ ഒന്നും ഐശു പുറത്തേയ്ക്കേ വന്നില്ല. എന്താകും അവള്‍ക്ക് പറ്റിയത്? അന്ന് ഉറങ്ങാന്‍ നേരം അവന്‍  ഉമ്മയോട് ചോദിച്ചു. 

"ഉമ്മാ ന്താ മ്മളെ ഐശൂ ഇപ്പം പൊറത്തക്ക് ഒന്നും ഏറങ്ങാത്തെ? ഓക്ക് സുഖല്യെ"? 

"ഓള്‍ ഞ്ഞി അങ്ങിനെ പുറത്തേക്ക് ഒന്നും വരൂല മോനെ ഒളൊരു വല്യ പെണ്ണായി" 

"അപ്പം ഇമ്മ വെല്യ പെണ്ണല്ലേ,​ഇന്ന്ട്ടെന്താ ഉമ്മ പുറത്ത്ക്ക് ഒക്കെ പോവുണ്ടല്ലോ"?

"മുണ്ടാതെ കെടക്കാന്‍ നോക്ക്, പിന്നെ ജ്ജി ഇനി അങ്ങോട്ടൊന്നും പോവണ്ട, അന്നേ ഇനി കാണ്

​ ​ ണത് ഓള്‍ക്ക് ഹറാമാ​.​"ഉമ്മ പറഞ്ഞതിലെ തത്വമോ നീതിശാസ്ത്രമോ ഒന്നും അസ്സന്‍കുട്ടിക്ക് മനസ്സിലായില്ല.ഒന്നുമാത്രം മനസ്സിലായി​,​ ഐശുവിന് എന്തോ പറ്റിയിട്ടുണ്ട്. ഐശുവില്ലാതെ സ്കൂളിലും മദ്രസ്സയിലും പോവുക എന്നത് അസ്സന്‍കുട്ടിയെ വലിയ വിഷമത്തിലാക്കി. ഉമ്മയറിയാതെ അവളെ ഒന്നുകാണാന്‍ എന്ത് വഴി?ഐശു കഴിഞ്ഞാല്‍ അസ്സന്‍കുട്ടിയുടെ ഏറ്റവും വലിയ നേരമ്പോക്ക് അല്ലംബ്ര കുന്നിലെ മുക്രി സൈനുപ്പാപ്പയും,​ കെട്ടിച്ചു നാലാംമാസം വിധവയായ മകള്‍ മൈമൂനയുമായിരുന്നു. സ്കൂള്‍ വിട്ടാല്‍ പിന്നെ ഉപ്പാപ്പാന്‍റെ വീടാവും അസ്സന്‍കുട്ടിയുടെ താവളം.ആണ്‍മക്കളില്ലാത്ത ഉപ്പാപ്പക്ക് റേഷന്‍കടയില്‍ പോവാനും കോരപ്പാടം അങ്ങാടിയിലെ മില്ലില്‍ പോയി നെല്ലും അരിയും പൊടിപ്പിക്കാനുമൊക്കെ അസ്സന്‍കുട്ടി വേണം. ഐശുവിനെ കാണാതായതില്‍പ്പിന്നെ അവിടേക്കുള്ള വരവും പോക്കുമൊക്കെ അസ്സന്‍കുട്ടി നിര്‍ത്തി.വൈകുന്നേരം ഉമ്മറപ്പടിയില്‍ ചടഞ്ഞുകൂടിയിരുന്ന അസ്സുവിനെ  നോക്കി അന്ന് ഉമ്മ പറഞ്ഞു,

​ "എന്താടാ ഇജിപ്പം ഉപ്പാപ്പന്‍റെ അടുത്ത്ക്ക് പോണതും നിര്‍ത്തിയോ? അന്നോട് ചെല്ലാന്‍ പറഞ്ഞു അവിടുക്ക്. അലിഫും ബാവും പഠിപ്പിച്ചു തന്നോരു പറിണത് കേട്ടില്ലേല്‍ കുരുത്തക്കേടു തട്ടും ട്ടോ".

സൈനുപ്പാപ്പന്‍റെ വീട്ടിലേക്ക് പോവുമ്പോള്‍ അസ്സന്‍കുട്ടിക്ക് വേറെ ഒരു ലക്ഷ്യം കൂടിയുണ്ടായിരുന്നു. രണ്ടാള്‍ ഉയരത്തില്‍ കെട്ടിയ വല്യപറമ്പത്തെ മതില്‍ ആരുമറിയാതെ ചാടിക്കടന്ന് ഐശൂനെ കാണാനുള്ള വല്ല ഉപായവും ഉപ്പൂപ്പയോട് ചോദിക്കാം. പുഞ്ചോടും കഴിഞ്ഞ് അല്ലംബ്ര കുന്നിനു താഴെയുള്ള ഉപ്പൂപ്പയുടെ വീട്ടിലെത്തിയപ്പോള്‍ ഉപ്പൂപ്പ  തെങ്ങിന്‍പട്ടയിലെ ഓലമടലില്‍നിന്നും ഈര്‍ക്കിലെടുത്ത് ചൂല്‍ കെട്ടുകയായിരുന്നു.

"എന്താ അസ്സന്‍കുട്ട്യേ അനക്ക് ഒരു വല്ല്യായ്ക,മൈമൂന അന്നെ കളിയാക്ക്യാ" 

"ഞാന്‍ കളിയാക്കിയതൊന്നും അല്ല ഉപ്പാ,ഓന്‍ക്ക് മ്മളെ ഐശൂനെ കാണാത്ത പ്രാന്താ"

"ഹാഹ്ഹ അതിനെന്താ പഹയാ ജ്ജി ബുദ്ധിമുട്ടണത്? അനക്ക് ഓളെ കാണണം അത്രല്ലേള്ളൂ? ഞമ്മള്‍ വഴിണ്ടാക്കാം.​" സൈനുപ്പാപ്പ  ആശ്വസിപ്പിച്ചു.

"രണ്ടാള്‍ പൊക്കമുള്ള ആകാശത്തോളം വല്യ ആ മതിലും ഗെയ്റ്റും ചാടി കടക്കാന്‍ എന്നെ കൊണ്ട് പറ്റൂല ഉപ്പാപ്പ, ങ്ങള്‍ വേറെ എന്തേലും പറിഞാളി"

"ചാടി കടക്കാന്‍ പറ്റൂല്ലേല്‍ ജ്ജി പാറി കടക്കടാ, അനക്ക് പറക്കാന്‍ ബെയ്ക്കോ? എന്നാല്‍ ഞാന്‍ അന്നെ പറത്തി തരാം" സൈനുപ്പ നിസ്സാരക്കാരനല്ല,വേണ്ടിവന്നാല്‍ ചുട്ടകോഴിയെ പറപ്പിക്കുന്ന ആളാണെന്ന് പണ്ട് ഐശുവാണ് പറഞ്ഞത്. അപ്പോള്‍ തന്നെ പറപ്പിക്കാന്‍ എന്താ പ്രയാസം?

"ന്നാല്‍ ഉപ്പൂപ്പ ഇന്നൊന്നു  പറക്കാന്‍ പഠിപ്പിക്ക്, എനിക്ക് പറക്കല്‍ പഠിച്ചിട്ടു വേണം ഐശൂനെ കാണാന്‍" 

"പറക്കണ വിദ്യന്നും ഇച്ചി പിടീല്യമോനെ, അയ്നോക്കെ പടച്ചോന്‍ തന്നെ വിജാരിക്കണം"​.​അതും പറഞ്ഞ് സൈനുപ്പാപ്പ മ്ഗരിബ് നിസ്കരിക്കാന്‍ വേണ്ടി വുളു എടുക്കാന്‍ പോയി. സൈനുപ്പാപ്പയും കൈ  മലര്‍ത്തിയപ്പോള്‍ അസ്സന്‍കുട്ടിക്ക് നിരാശയായി. കറുത്ത കാവിയിട്ട വരാന്തത്തിണ്ണയില്‍ വിഷമിച്ചിരിക്കുമ്പോഴാണ്‌ മൈമൂന വാതില്‍പ്പടിയില്‍നിന്നും പുറത്തേക്കുവന്നത്.

"എടാ അനക്ക് പറക്കണം അത്രെല്ലേ വേണ്ടിയേ? എനിക്കറിയാലോ ആ സൂത്രം" 

"മൈമൂനതാത്ത എന്നാല്‍ ഒന്ന് പറഞ്ഞുതാ​..​ ന്നാല്‍, ഞാന്‍ എന്ത് വേണേലും കൊണ്ടത്തരാം"
"എനിക്ക് പേടെങ്ങലെ താലപ്പൊലിക്ക് പഞ്ചസാര ജിലേബിയും ശര്‍ക്കര ജിലേബിയും വേണം​.​

​​ പിന്നെ കോയ കുട്ടികാക്കന്‍റെ ഫാന്‍സി പീട്യേല്‍ന്നു മുത്തുമാലയും കരിവളയും വേണം​.​ ഞാന്‍ എന്ത് പറഞ്ഞാലും എനിക്ക് വാങ്ങി തരണം​.​ ഇതൊക്കെ തന്നാല്‍ ഞാന്‍ പറക്കണ വിദ്യ പഠിപ്പിച്ചു തരാം"എല്ലാം സമ്മതിക്കുക തന്നെ​.അങ്ങിനെ അസ്സന്‍കുട്ടി കുറച്ചു കാലത്തേക്കെങ്കിലും മൈമൂനയുടെ അടിമയായി. ദിവസങ്ങള്‍ ആഴ്ചകള്‍ക്ക് വഴിമാറി​​. ​എന്നും ഓരോ കാരണങ്ങള്‍ പറഞ്ഞ് മൈമൂന അസ്സന്‍കുട്ടിയെ പറക്കല്‍ വിദ്യയുടെ 'പേറ്റന്റ്' കൊടുക്കാതെ നീട്ടിക്കൊണ്ടുപോയി.

വളയും കമ്മലും മാലയുമൊക്കെ യഥേഷ്ടം മൈമൂനയുടെ വീട്ടിലെത്തിയതല്ലാതെ അസ്സന്‍കുട്ടി 'പറന്നില്ല'. ക്ഷമ കെട്ട അസ്സന്‍കുട്ടി മൈമൂനയുമായി വഴക്കുണ്ടാക്കിയ ഒരു ദിനത്തില്‍ ഗത്യന്തരമില്ലാതെയവള്‍ ആ "രഹസ്യം"  അസ്സന്‍കുട്ടിയോട് പറഞ്ഞു!.

"ഡാ അസ്സൂ, ഈ കാക്കയും പരുന്തുമൊക്കെ എങ്ങിനെ പറക്കല്? 

"അയിനു പടച്ചോന്‍ പറക്കാനുള്ള കയിവ്  കൊടുത്തിട്ട്"
​"​അത് സമ്മതിച്ചു,ന്നാലും ആ കയിവു   എന്താന്നു ഞാന്‍ പറയാം ​.അത് ചിറകാണ് ചിറകുണ്ടായിട്ടാണ് അത് പറക്കുന്നത്. അത് പോലെ വിമാനത്തിനും ചിറകുണ്ട്, ഈ ദുനിയാവില് പറക്കുന്ന എല്ലാത്തിനും ചിറകുണ്ട്, അങ്ങിനെയാണേല്‍ നിനക്കും ഒരു ചിറകുണ്ടെല്‍ പറക്കാം"

"അയിന് എനിക്ക് ചിറകില്ലല്ലോ"  അസ്സന്‍കുട്ടി ദേഷ്യത്തോടെ പറഞ്ഞു."​

എന്നാല്‍ ആചിറക് ഉണ്ടാക്കാനുള്ള വഴി ഞമ്മക്കറിയാലോ, അന്റെ വീട്ടില്‍ മുറംല്യേ? ആ മുറം രണ്ടു കയ്യിമ്മലും കെട്ടി നല്ലോണം വീശുക അപ്പോള്‍ അനക്ക് പറക്കാം"അകത്തുവന്ന ചിരി പുറത്തേക്ക് കാട്ടാതെ മൈമൂന ആ വലിയ 'രഹസ്യം' അസ്സന്‍ കുട്ടിക്ക്  കൈമാറി​.

​​ അല്ലംബ്ര കുന്നില്‍നിന്നും വീട്ടിലെത്തുന്നതുവരെ അസ്സന്‍കുട്ടിക്ക് ഒരു സമാധാനവും ഉണ്ടായില്ല​.​എങ്ങിനെയെങ്കിലും ഉമ്മ കാണാതെ മുറം കൈക്കലാക്കണം. പിറ്റേന്ന് ഉമ്മ പുറത്ത് പോയപ്പോള്‍ അടുക്കള മുഴവന്‍ പരതി. മൂലക്ക് വെച്ച ഒരു മുറം ആരും കാണാതെ ചായ്പ്പില്‍ കൊണ്ടുവച്ചു. പിന്നെയൊരെണ്ണമുള്ളത്  അടുപ്പിനുമുകളിലെ ചിമ്മിണിക്കൂടിലായിരുന്നു. പുതിയ മുറം വാങ്ങിയാല്‍ അത് ഉറപ്പുകൂടാന്‍ പുക കൊള്ളിക്കാനായിരുന്നു അവിടെ കയറ്റിവെച്ചത്.അതുപക്ഷേ ഉയരത്തിലായതിനാല്‍  കയറാനും പറ്റില്ല.ആരും കാണാതെ തൊട്ടപ്പുറത്തെ വീട്ടില്‍ നിന്നും ഏണിയെടുത്തുകൊണ്ടുവന്ന്  മച്ചിന് മുകളില്‍ കയറി രണ്ടാമത്തെ മുറവും സ്വന്തമാക്കി അസ്സന്‍കുട്ടി നേരെ സൈനുപ്പാപ്പന്‍റെ വീട്ടിനു തൊട്ടുമുകളിലെ മാവിന്‍ ചുവട്ടിലെത്തി​.​​ മാവിന്റെ ഉയരമുള്ള കൊമ്പില്‍ കയറി താഴോട്ടു ചാടാനായിരുന്നു അത്ഒരുപാടു സമയമെടുത്ത് രണ്ടുകയ്യിലും മുറം വരിഞ്ഞുകെട്ടി. പിന്നെ മാവില്‍ കയറാന്‍ ശ്രമിച്ചുനോക്കി. രണ്ടുകയ്യിലും മുറം ഉള്ളതിനാല്‍ എത്ര ശ്രമിച്ചിട്ടും കയറാന്‍ കഴിയുന്നില്ല​.​അപ്പോഴാണ്‌ അസ്സന്‍കുട്ടിക്ക് വേറൊരു ബുദ്ധിയുദിച്ചത്. ഒരു കയ്യിലെ കെട്ടഴിച്ച് അള്ളിപ്പിടിച്ചു കയറാം. മുകളിലെത്തിയിട്ട് മറ്റേകയ്യില്‍ മുറം കെട്ടാം

​പാടുപെട്ട് മാവിലെ ഉയരമുള്ള കൊമ്പില്‍ കയറി അസ്സന്‍കുട്ടി രണ്ടാമത്തെ മുറവും ഒരു വിധം കയ്യില്‍ വരിഞ്ഞുകെട്ടി. താഴേക്ക് നോക്കുമ്പോള്‍ ഒരു പൊട്ടുപോലെ കാണുന്ന മണ്ണുമ്മല്‍ അങ്ങാടിയും ഉറുമ്പ്‌ അരിച്ചു പോകുന്നതുപോലെ  പുഞ്ചോട് പാടത്ത്  പന്ത്  കളിക്കുന്നവരെയും കണ്ടപ്പോള്‍ അസ്സന്‍കുട്ടിയുടെ കൈകാല്‍ വിറയ്ക്കാന്‍ തുടങ്ങിയിരുന്നു.രണ്ടുകൈകളിലേക്കും നോക്കി സ്വയംസുരക്ഷാ പരിശോധനയും ഉറപ്പുവരുത്തി ഒന്നൂടെ താഴേക്ക് നോക്കി. പറന്നുപറന്നു താഴെ എത്തുമ്പോള്‍ ഒരു പരിക്കും വരില്ലല്ലോ എന്ന സമാധാനത്തില്‍ ഒമാനൂര്‍ ശുഹദാക്കളുടെ ആണ്ടുനേര്‍ച്ചയിലേക്ക്  നാലുറുപ്പിക നേര്‍ന്ന് ഹസ്സന്‍കുട്ടി രണ്ടും കല്‍പ്പിച്ച്  'താഴേക്ക് പറന്നു

മാവിന്റെ ഒരു ഭാഗത്ത് നല്ലൊരു കല്ലുവെട്ട് കുഴിയുണ്ടായിരുന്നു.അതില്‍ നിറയെ പുല്ലും ചെറിയ മരങ്ങളും കാടുപിടിച്ച് കിടന്നിരുന്നു. അസ്സന്‍കുട്ടിയുടെ ഹെലികോപ്റ്റര്‍ ആ കല്ലുവെട്ടുകുഴിയെ ലക്ഷ്യമാക്കി  'അതിവേഗം ബഹുദൂരം​​'കുതിച്ചുകൊണ്ടേയിരിക്കുകയാണ്. ആവുന്നത്ര കൈവീശി ടെയ്ക്ക് ഓഫ് ചെയ്യാന്‍ അസ്സന്‍കുട്ടി ശ്രമിച്ചങ്കിലും മുമ്പ് ഇന്ത്യ വിക്ഷേപിച്ച റോക്കറ്റുകള്‍  പോലെ നേരെ താഴോട്ടുതന്നെ പൊയ്ക്കൊണ്ടിരുന്നു. പെട്ടന്നാണ് അത് സംഭവിച്ചത്.

 ​ ​വിമാനത്തിന്‍റെ മുന്നോട്ടുള്ള 'ഗമനത്തില്‍' ഇടത്തെ കയ്യിലെ ചിറക് മാവിന്റെ ഏറ്റവും അടിയിലെ കൊമ്പിലുടക്കി വിമാനം മാതൃപേടകത്തില്‍നിന്നും വേര്‍പെട്ട് സ്വതന്ത്രമായി. ഏകാംഗചിറകുമായി കല്ലുവെട്ടുകുഴിയിലേക്ക് ലാന്‍ഡ്‌ ചെയ്യാന്‍ നേരം അസ്സന്‍കുട്ടി  

"ന്‍റെ അള്ളോ ന്നെ കാത്തോളണ ​..." എന്ന് അല്ലംബ്ര കുന്ന് ഞെട്ടുമാറുച്ചത്തില്‍ അപകട മുന്നറിയിപ്പ് കൊടുത്ത് ആര്‍ത്തുവിളിച്ചു.ഈരേഴുപതിനാലുലകവും ആ കുറഞ്ഞ സമയത്തില്‍ അസ്സന്‍കുട്ടി കണ്ടു. അധികം വൈകാതെ വിമാനം കല്ലുവെട്ടുകുഴിയുടെ അടിവാരത്തില്‍ 'സുരക്ഷിതമായി' ലാന്‍ഡ്‌ ചെയ്തു.

മനോരമ ആഴ്ചപതിപ്പിലെ തുടര്‍നോവല്‍ 'ഖത്തം' തീര്‍ക്കുമ്പോഴായിരുന്നു മൈമുന അസ്സന്‍കുട്ടിയുടെ ആ 'നിലവിളി യന്ത്രത്തിന്‍റെ' ശബ്ദം കേട്ടത്. സൈനുപ്പാപ്പയെയും കൂട്ടി അസ്സന്‍കുട്ടിയുടെ അടുത്തെത്തിയപ്പോള്‍ അവള്‍ കണ്ടത് ഒരു  ചിറക് മാവിലും മറ്റേ ചിറക്  കല്ലുവെട്ടുകുഴിയിലുമായി  ക്രാഷ് ലാന്റിംഗ് നടത്തിയ അസ്സന്‍കുട്ടിയെയാണ്.ഓടിവന്ന മുല്ലാക്ക ആദ്യം അടി കൊടുത്തത്  മൈമൂനയുടെ ചെകിട്ടത്തായിരുന്നു.വഴിയെ വിവരമറിഞ്ഞുവന്ന അസ്സന്‍കുട്ടിയുടെ ഉമ്മയുടെ വിഷമം അസ്സന്‍കുട്ടി വീണതിലായിരുന്നില്ല,​ ആറ്റു നോറ്റ് അട്ടത്തുവെച്ച മുറം പൊളിഞ്ഞതിലായിരുന്നു. വിമാനത്തിന്റെ ബ്ലാക്ക്ബോക്സ് പെറുക്കിക്കൂട്ടി അവര്‍​,​ എന്തോ ഭാഗ്യം കൊണ്ട് അധികം പരിക്കുകളൊന്നുമില്ലാതെ രക്ഷപെട്ട അസ്സന്‍കുട്ടിയെ അടുത്തുള്ള ആശുപത്രിയില്‍ പ്രവേശിപ്പിച്ചു. നാലാംനാള്‍ ആശുപത്രി വിട്ട്‌ വീട്ടിലെത്തിയ അസ്സന്‍കുട്ടിയെ കാശുകൊടുത്ത് വാങ്ങിയ മുറം നശിപ്പിച്ചതിന് ഉമ്മ പൊതിരെ തല്ലി.അങ്ങിനെ ഡബിള്‍ സെഞ്ച്വറി അടിച്ച വേദനയില്‍ കിടക്കുമ്പോഴാണ് പുറത്തുനിന്നും ആരോ വിളിക്കുന്നത് കേട്ടത്.

"മ്മളെ വിമാനം അസ്സൂ ഇബടെ ല്യേ"  ശബ്ദം കേട്ട് പുറത്തിറങ്ങിയപ്പോള്‍ ഒരു കവറില്‍ നാരങ്ങയുമായി ഐശുവും ഹാജിയാരും​.​

"എടാ അനക്ക് ഓളെ കാണാന്‍ പറ്റൂല്ലന്നു ആരാ പറഞ്ഞത്? ഇജ്ജി ഓളെ ആങ്ങള അല്ലെ.

​ ​

ആങ്ങളക്കും പെങ്ങള്‍ക്കും തമ്മില്‍ കാണല്‍ ഹറാമാണന്ന് ആരാ അന്നോട്‌ കിത്താബോതി തന്നത്? ന്നാ ഇത് പിടി" അതും പറഞ്ഞ് ഹാജിയാര്‍ ആയിശൂന്റെ കയ്യിലെ ഓറഞ്ചുവാങ്ങി അവന്റെ കയ്യില്‍ കൊടുത്തു.

യാത്രപറഞ്ഞുപിരിയുമ്പോള്‍ തിരിഞ്ഞുനിന്ന് കൊഞ്ഞനംകുത്തി ഐശു പറഞ്ഞു​,​

​"അനക്ക് അങ്ങിനെ തന്നെ ബേണം ഡാ ബിമാന ഡ്രൈവറെ... "

തിരിഞ്ഞുനോക്കി ആരും കാണാതെ കണ്ണിറുക്കി ഹാജിയാരെ കൈപിടിച്ചു നീങ്ങുന്ന ആയിശൂനെ തന്നെ നോക്കുമ്പോള്‍ അലംബ്ര കുന്നില്‍നിന്നും വീശിയ നേര്‍ത്ത കാറ്റ്,​ മുറിവ് വീണ അസ്സുവിന്റെ കയ്യിനെ തടവിക്കൊണ്ടിരുന്നു.    .................................  ( ശുഭം)  

 ​വര : ഇസഹാക്ക് . 

നന്ദി : മഴവില്‍ മാഗസിന്‍